Archive for the ‘كلام العيال البلوجريه’ Category

لقاء بورسعـيد والتوكتوك البحرى

November 19, 2008
يوم الجمعــة 14/11/2008م كـان لقـاء المدونين فى بورسعيد ، وزيارة لملجأ الأيتام و فسحة فى القناة وشوارع المدينة ، ولن أطيل فى وصف اليوم .. لان الاصدقاء كلهم قاموا بالواجب وزيادة .. إنظر قائمة الناس اللى كتبوا عن اليوم فى آخر البوست

لكن من واقع الزيارة .. استطعت ان استنتج الملاحظات الاتية
اولاً : إن وسيلة النقل الحكومية المجانية الوحيدة فى مصر هى المعدية التى تعبر من بورسعيد لبورفؤاد .. وعرفت ده بعد ما حلفت طلاق تلاتة ان انا اللى دافع الاجرة .. وطبعا لما عرفت انها مجانية تنفست الصعداء

ثانياً : إن الاغذية والاطعمة فى بورسعيد مش مرشوشة مبيدات زى الأغذية فى باقى المدن .. وانما مرشوشة كوكايين ومخدرات .. حيث اننى اول ما تناولت الغذاء .. ما شوفتش الدنيا دى عاملة ازاى

ثالثاً : إن سبب وقوع داليا أهو ده عيبه فى المعدية لم يكن ان سواق المعدية ضرب فرامل فجاءة ، حيث اننا لم نسمع صوت احتكاك كاوتش المعدية بالماء .. وانما لأن داليا ربما كانت تضمر شراً ، أو لم تكن نيتها صافية .. أو لإنها محسودة

رابعاً : إن الأطفال فى بورسعيد يختلفون عن باقى الاطفال .. حيث انهم تأثروا بجو الحروب التى قامت فى بورسعيد عبر التاريخ ، لذلك من السهل جداً ان تجد فى بورسعيد طفل يلعب – بمنتهى البراءة – بمنشار

خامساً : إن مشاهد من أفلام إشاعة حب ليوسف وهبى وعمر الشريف ، وفيلم المشبوه لعادل إمام قد صوِّرت فى فنادق فى بورسعيد .. والفندق الأثرى بتاع إشاعة حب هدّوه وعملوا مكانة جنينه وفيها مراجيح

سادساً : ان سواق المعدية يختلف عن سواق الأتوبيس .. سواق المعدية لا يقف الا فى المحطات ، وما بيرضاش ينزل ركاب فى وسط الميه

سابعاً : إن قناة السويس عندم اكانت تستخدم لنقل الاسلحة الامريكية كان يُمنع الوقوف لأى شخص على ضفة القناة نهاراً ويتم إطفاء كافة الانوار ليلاً

ثامناً : إن الأيتام فى الملجأ لا يحتاجون فقط لدعم مادى ، وإنما لدعم معنوى ونفسى أيضا ونسبة كبيرة منهم يعانون من مشاكل نفسية .. ملحوظة : مش الأيتام اللى فى الملجأ بس .. لكن واللى بره الملجأ كمان .. راجع مدونة احمد الصباغ وانت تتأكد بنفسك

تاسعاً : إن أطفال بورسعيد أكتر رقة من المخاليل حيث يكتفون باللعب بأدوات عادية مثل : المنشار أو فاس أو مُـلِّة سرير ، ولا يمتد بهم الامر للغـزّ بالمطوة ، أو الوخز بالأبر ، أو النطح بالروسية ، أو خزق العين كما يفعل المخاليل

عاشراً : إن موقف الترجمان الذى كنت منه عام 2001 لعملى بمدينة السادات وقتذاك وكانوا يتعاملون بنظام – نفر كفر الشيخ يا كابتن – أصبح أسمع ميناء القاهرة البرى وبه – سبحان الله – سلالم كهربية متحركة وكافيتريا وإذاعة داخلية تنادى على المسافرين زى المطار كدة

حادى عشر : إن البورسعيدية يعشقون اللون الأزرق .. وتجد اللون الأزرق فى كل شئ فى بورسعيد .. التاكسى .. واجهات المحلات ، والعمارات ، والفنادق .. والبيوت .. وأقماع المرور .. لدرجة أن البحر والسما فى بورسعيد لونهم – سبحان الله – أزرق.

ثانى عشر : إن سارة رحيل كسرت القاعدة التاريخية الشهيرة التى تؤكد إنها عندما تؤكد حضورها للقاء فإنها بالتأكيد لن تحضر .. وفى هذة المرة حضرت .

ثالث عشر : إن انت من الممكن يبقى رقم موبايلك زيرو اتناشر ومع ذلك تكون – سبحان الله – فودافون .. وهذة المعلومة عرفتها عندما دخلنا أنا ونسمة وعسقول لمركز خدمة فودافون عشان ندخّــل موبايل نسمة الإنعاش .

رابع عشر : إن البورسعيدية بياكلوا الحلبة المنبتة فى طاجن بعد وضع الليمون عليها وهذة الأكلة لم أراها فى القاهرة.

خامس عشر : إن خالد همس الأحباب ، وعسقول و إحسان بك قد لعبوا الدنيئة معايا وشاركوا الجبهة البورسعيدية فى تصويرى أثناء تناول الطعام .. ونقول ” تناول الطعام ” مجازاً عن تعبيرات تدميرية أكثر دقة مثل : إغتصاب الأطباق ، والتحرش بالسمك ، وإبادة السلطة

سادس عشر : إن القناة يعبر بها عبّــارات وسفن شديدة الضخامة وعندما رأيت عبّــارة ضخمة تحيط بها سفن صغيرة وتمشى أمامها لنشات تشبه التكتك البحرى.. ظننت إن عبّــارة الريس معدية ودى التشريفة بتاعتها

!!!!!


الحاضـــرون
: نسمة هى فوضى – إيناس نهر الحب – أحسان بيه – شفقة هانم – ابن حجر العسقلانى – خالد همس الأحباب – بابا أبو خالد وزوجتة وإبنه خالد – سارة محاولات رحيل – داليا أهو ده عيبة – دعاء ربع ضارب – الكتاتنى – جاسر شباب روش طحن – سارة كوكا – ايمان كلام من القلب – ماما أمولة – أحمد الصباغ

آخــرين كتبــوا عن زيارة بورسعــيد
إيناس نهر الحب – بنات وتليفون
نسمة الجميلة صاحبة أحدث مدونة – أحلى يوم بجد

داليا أهو ده عيبه – كان يوم مفرح

أحمد الصباغ

مكالمة تليفونية بين الكومى والمدوّن أبو الليل

November 12, 2008
محمد الكومى بعت لى الرسالة دى
ومضمونها مكالمه بينه وبين المدوّن أبو الليل
الذى ترك التدوين من فترة لظروف صحية سيئة
حــالة بصريــة متدهورة جداً
وتضامن الكومى معه بإنشاء جروب له على الفيس بوك
محبّى مـدوّنـة أبـو الليــــل
وبناءأ على طلب الكومى ومحبى مدوّنة أبو الليل
وتضامناً معه فى أزمته الصحية
ننشر نص المكالمــة

مساء الخير

مساء النور
ابو الليل؟

ايوة الكومي معايا؟

ايوة يا فندم ازيك و ازي صحتك

انا الحمد لله تمام و عايز اشكرك جدا على الجروب ده و عياز اقولك انه رفع جدا من معنوياتي و حسسني ان الواحد كان ليه مكانة في قلوب الناس فبلغ شكري للناس اللي في الجروب فرد فرد

و الله دي حاجة بسيطة جدا يا دوبك عملناها كدة لان اللي شدنا ليك صدق كلامك و دي فكرة جاتلي بس و كان الهدف منها نقول للناس ان في واحد كان بيتكلم بلساننا كلنا و باكلام اللي عايزين نقوله و ممكن نتكسف

و الله يا كومي ماتتخيلش سعادتي تفوق الوصف و انا متأثر جدا بالجروب ده

طيب ايه اخبار صحتك يا استاذنا و هل يا ترى في تحسّن ولا ايه الاخبار

للاسف الحالة البصرية متدهورة جد في كلتا العينين و بالكاد ارى

و لكن انهاردة يعني ابتديت مرحلة علاجية جديدة و ربنا يسهل

طيب مجال عملك  ايه او في اي حاجة نقدر نقدمها

انا كنت شغال في الهندسة المدنية و طبعا بسبب الحالة الصحية سبت الشغل من حوالي سنتين
انا يا كومي عايزك تشكرلي جدا كل الناس اللي في الجروب و الله لو اطول اتواصل معاهم لاشكرهم بننفسي
و عايزك توصلهم اني مشتاق لهم و مشتاق للكتابة و مشتاق لابو الليل

طيب ماتحاول ترجع تكتب تاني يا استاذنا

و الله هو انا ممكن ادون صوتيات او فيديو بس ك الفكرة اني في عزلة حاليا و معتكف و بتكيف مع الوضع الجديد لان دي خبرة صعبة جدا اللي مريت بيها بس الحمد لله احنا راضيين يعني

تعرف يا استاذنا كنت قريب في القاهرة و قابلت مجموعة مدونين من مختلف الاطياف و المستويات الثقافية و الفكرية و كل ما اجيب سيرتك او افتح موضوعك اقسم لك بالله العظيم انهم كلهم اجمعوا على الاشتياق لك و لكتابتك خصوصا بعد انتشار ظاهرة التفاهة في التدوين و بعد ما لمسوافعلا انك كنت بتمثل حالة جميلة، ووالله حتى منهم سيدات و انسات محترمات للغاية كانوا بيدخلوا عندك و يعلقوا
و منهم استاذة جامعية قالتلي انا بتحفظ على الفاظه لكن راجل بيكتب بمزاج عالي جدا

و الله ربنا يكرمهم جميعا صدقني يا كومي انا مشتاق لهم للغاية و ارجو انك توصلهم سلامي الحار جميعا
هو انت عندك مدونة ايه يا كومي؟

انا عندي مدونة ليبرالي مصري و دي جديدة و مدونتي القديمة ملك الكبدة

ياااااااااااااااااااااااه هو انت ملك الكبدة انت علقت عندي اخر 3 او 4 بوستات قبل ما ابطل و الله انت ابن حلال انت ظهرت في الاواخر كنت من الناس اللي ناوي اتابعها بس ماحصلش نصيب

لا ان شاء الله في نصيب تشوفني و تشوف اللي احسن مني كمان و احنا و الله دي حاجة بسية جدا عملناها تعبيرا عن شعورنا ناحيتك و تقديرا لصدق الكلمة

انا بشكركم جدا و الله

ممكن اطلب منك طلبين؟

اؤمرني يا حبيبي

انا عايز لما اجي القاهرة اقدر اشوفك

اوي اوي
و ذكر لي عنوانه

ممكن انشر المكالمة دي في رسالة للناس

طبعا وبلغهم ارق تحياتي القلبية و اشتياقي ليهم و تقديري لمشاعرهم النبيلة

تمنياتنا لأبو الليل بالشفاء
ملحوظة : الصورة منقولة من مدوّنة أبو الليل

طب نقرا الفاتحة على بلوجر

October 9, 2008

طب بما إن الحزب الوطنى دخل عالم التدوين من خلال مدونة
ابن الحزب الوطنى البار

فأنا خايف على بلوجر لتحصل فيه حريقة

قبل ما تدخل البار قصدى مدونة الابن البار ومنعا للشلل
عايزك تقرا نص المقال ده اللى سجن إبراهيم عيسى

الألهه لا تمرض

الرئيس فى مصر إله والآلهة لا تمرض ، لهذا السبب يخفى الرئيس مبارك والمحيطون به والمنافقون له أمر مرضه يتركون البلد نهشا للشائعات ونهبا للأقاويل ، ولا ينطقون بل يضللون الناس عن معرفة الحالة الصحية للرئيس ، ومبدئيا فالريس نفسه ليس مريضا مرضا خطيرا لكنه مرض سنه ، فضلا على أن الرئيس حتى لو أصيب بالأنفلونزا يجب أن يعرف الشعب والمشكلة أن الغرباء يعرفون .. البيت الأبيض لديه تفصيل شبه يومية .. تل أبيب تعرف وتتابع .. دوائر غريبة كثيرة تعرف حقائق حول مرض الرئيس أو سفره للعلاج
بل أوروبا تستقبله للعلاج بأجهزة مخابراتها و دوائر منها ، إذن السر فقط على المصريين ، و لولا أن الرئيس ترنح مغشيا عليه أمام شاشات التليفزيون فى خطبة له منذ أعوام ، ما كان لأحد أن يعرف حالة صحة الرئيس ، و لولا انه سافر للعلاج طويلا فى ألمانيا ما قال احد عن مرضه شيئا ، فالحاصل أن دولة مبارك تريد أن تقدم الرئيس باعتباره شخصا مقدسا لا يخطئ و لا يراجعه احد و لا ينافسه شخص ، و هذه الصفات تعنى قطعا انه لا يمكن أن يمرض ، بل و لا يفكر أحد أنه يمكن أن يموت مثلما يموت البشر !!
لكن الأمر يتجاوز فكرة مرض الرئيس إلى حاضر و مستقبل البلد ، فالمؤكد أن عائلة الرئيس و السيدة سوزان مبارك تحديدا كما يعلم الكافة حدانا و فى الخارج تضغط بقوة منذ فترة كى يتنحى الرئيس عن الحكم و ينقل الرئاسة على عينه و فى حياته إلى جمال مبارك ، و الرئيس هو الشخص الوحيد فى العائلة الذى يقاوم هذه الخطوة سواء لتمسكه بالبقاء فى السلطة دون الخروج عنها إلا بقرار قدرى ، أو قلقا من استفزاز الشعب المصرى و جنرالات لهم أولوية كبرى لدى مبارك ، بل و يخشى الرئيس على حياة نجله متى صمم على نقل السلطة إليه ، لكن مع ظروف مرض الرئيس و داخل بيت تحكمه عواطف الأبوة النبيلة و مشاعر الوفاء لزوجة هى رفيقة عمر و شريكة كفاح قد يضعف قلب الأب ، و يتغلب على عقل الرئيس ، و هو ما يعنى أن مستقبل مصر مرهون فعلا بقرارات عاطفية يتخذها رئيس فى لحظة مرض ، ثم إن مرض الرئيس يعنى غيابا مؤقتا عن الإمساك بكل الخيوط ، الأمر الذى يوفر فرصة لجهات و أسماء من قصر الرئاسة أو من خارجه كى تمد يدها لتفعل ما تريد ، بل لعل حملات القبض على الإخوان و الاستنفار الأمنى الخشن ضد الصحف الخاصة و التعجيل بانتخابات الحزب الوطنى و دفع أسماء موالية لجمال مبارك و أحمد عز ضد رجال صفوت الشريف و كمال الشاذلى كلها خطوات يلعب بها النجل لصالح الضغط على أعصاب أطراف داخل الدولة كى ينقل وجوده فى الرئاسة إلى شأن مفروغ منه ، بل لعل شائعات صحة و مرض الرئيس و هذا التدافع المتتالى لها سببه رغبة النجل فى فرض أمر واقع ليقع على رءوس الجميع دون أن يتصور أحدهم أن بامكانه أن يرفضه ، فما بالك بأن يرده ، يبقى أن الرئيس مبارك – حسب مصادر طبية – مريض فعلا بقصور فى الدورة الدموية مما يقلل نسبة و كمية وصول الدم إلى أوعية المخ الدموية فى لحظات تسفر عن إغماءات طبيعية تستغرق بين ثوان و دقائق ، و هو ما يفسر ( إن صح ) الشائعة ( إن صحت ) التى تتحدث عن رؤية الرئيس و هو يترنح أو يهتز ذات مرة أثناء قيامه بزيارة لمؤسسة رسمية ، و سأترك لك حرية الاتصال بطبيبك الخاص أو بطبيب قريبك أو جارك لتعرف بنفسك آثار قصور الدورة الدموية على رجل فى سن الرئيس ، و ما ينتج عن ذلك من أمور ، لكن المؤكد أن هذا المرض ليس من الأمراض العضال ، و يمكن أن يحيا به المرء سنوات طويلة ، لكن السؤال ألا يؤثر هذا على بلد و دولة !! ألا يستدعى هذا من الرئيس أن يرتاح . جمال مبارك رأيه كده ، أن يرتاح الرئيس و يترك له الرئاسة .. أما دوائر أخرى فى البلد فهى متوترة جدا و تخشى الصمت، و لكنها تخاف التحرك ، و أجهزة أخرى تريد من الجميع أن يخرس و يسكت و يلم نفسه ، و هى تلم بعضنا بالسجن أو التهديد .. و أخشى ما أخشاه أن يتحول مرض الرئيس إلى فرصة كبيرة تمرض مصر أكثر مما هى فيه من مرض ، يتقاعد عن الحركة و يصيبها كما نرى بقرح فراش تشوهها و تشيله
!!!
خش بقى على البار

بابا أبو خالد راح فين؟

October 4, 2008
بدخل على مدونتة لقيتة بيقولى
معذرة، تمت إزالة المدونة الموجودة في
abukhaled8.blogspot.com
لم يعد هذا العنوان متاحًا لمدونات جديدة.
وهمس المفروسة أند متغاظة ودعاء مواجهات قالولى
ان الناس بقالها كذا يوم مش لاقية المدونة
اتصلت به الموبايل مقفول
كاتب على الفيس بوك
إلي كل من تسببت له في لحظة ألم سامحني أكرمك الله
ياريت يا اخونا حد من بتوع بورسعيد يسأل عنه ويطمننا
سألت الناس اللى تعرف موضوع الغاء المدونة
قالوا انه بقالة يومين وهو كان باعت رسالة فيس بوك يوم واحد اكتوبر
ياريت اللى يعرف حاجة يطمننا

الجيزاوى تزوج إلى رحمة الله

October 4, 2008
تهنئة عالسريع
تزوج الى رحمة الله كل من المدون أحمد الجيزاوى والمدونة الضاكتورة شاهيندا
بقدم لهم كل التهانى والامانى الطيبة
ويارب دايما فرحانين وحياتهم جميلة ويبعد عنهم كل شر
مش عارف ليه اما بشوف الجيزاوى وشاهندا بفتكر مشهد من مسرحية إلا خمسة .. اللى هى بتاعة انتى جاية تشتغلى سواقة
المشهد اللى بياع الروبابيكا بيقول لعادل خيرى
لا احب اروح لدكتور ولا محامى
تدخل عند ده تخرج وفيك أمراض الدنيا كلها
وتدخل عند ده تخرج وانت متهم وشايل بلاوى الدنيا
انبى يارب تخرجنى من دار البلا بِلا بلا
ههههههههههه
وشوفوا بقى ده مش اى محامى ولا دى اى دكتورة
الجيزاوى اما بسلم عليا بحاول اشيل بصمات صوباعى بعد كدة
وكمان شاهيندا بحس فى عيونها بعبقرية طبية ولما بدخل مدونتها بخرج اعمل عملية اللوز على السريع
اللى فات ده كان دعابة الجواز وده واجب وطنى تجاه كل متجوز

بهنى الجيزاوى وشاهندا بالزواج السعيد
وبدعى لهم بكل توفيق وحياه سعيدة
ويسعدهم ربنا ويكرمهم
وكل سنة وانتم طيبين وايام سعيدة عليكم

أحمد الصباغ

!المدون المزنوق

October 3, 2008
قبل ما يظهر بلوجر ويظهر التدوين الالكترونى
كنا بنعانى احنا شباب مصر
من غياب حرية الكلمة بشكل كبير
لأنك صعب تقول كلمة حق فى جريدة او مجلة وصعب الوصول لها
وانهاردة بلوجر إدانا مساحة حرية بلا حدود
تتكلم وتقول اللى انت عايزة فى اى وتستخدم المدونة بالشكل اللى تحبه
وحدود الحرية … هى فقط ما يضر الاخرين
لكن غير كدة اكتب ما تشاء .. وافعل ما تشاء
واعتقد فى ما تشاء
وده الفكر اللى كان سائد اول ما دخلت التدوين فى الربع الاول من عام 2007م
لكن انهاردة واحنا فى اواخر 2008 الوضع اختلف كتير
الفكر السائد هو .. ان المدون لما بيكتب حاجة يبقى لازم نقول له ليه؟؟ وازاى؟؟
انت ازاى تكتب كدة ؟؟ وعشان ايه؟؟ وليه؟؟ وفين؟؟

المدون بيكتب فى السياسة وبيشارك فى حملات تضامنية
مدون عامل فيها مناضل وهو لو شاف عسكرى هيطلع يجرى

مدون بيتكلم فى امور بعيد عن السياسة
مدون عامل زى خالتى بهانة غاوى حكايات مش بيشارك فى مشاكل مجتمعة

المدون يحط صور ويحضر لقاءات ويشوف مدونين
ده مدون فاضى بيحب الشهرة والمنظرة وغاوى نجومية

المدون يدون من البيت ويخفى شخصيتة
ده واحد جبان مستخبى ورا الشاشة .. يقول ما لا يفعل

مدون يزور مدونات ويعلق ويشارك
ده مدون فاضى مش لاقى حاجة يعملها ومقطوع

مدون ما يزورش الا مدونات معينة وما يهتمش انه يكتب تعليقات
مدون مغرور منعزل متكبر فاكر نفسة من الصفوة

مدون يكتب عن الغير
فين يا عم الكتابة عنك .. انت عامل المدونة عشان تكتب عن الناس؟

مدون يكتب عن نفسة
ياعم فلقتنا .. انت فاكر نفسك حد مهم عشان تقعد تكتب عن نفسك

مدون يكتب عن ذاتة ووجدانة
مدون متعقد لازم يدخل مستشفى المجانين

مدون يكتب كتابات كوميدية ساخرة
مدون معرّضها وفرحان بنفسة ومتفاءل وخلية لغاية ما يتصدم

مدون بيكتب بوست كل يوم
ايه ياعم ومين فاضى يقرا لك كل يوم

مدون بيكتب بوست كل تلات ايام
ياعم ده انا كنت هنسى انك مدون اصلا

مدون بيكتب بوست كل اسبوع
ياراااجل .. انت لسه فاكر تكتب والله افتكرناك مت

مدون بيشجع على المشاركات الخيرية
عامل مؤمن وبتاع خير وهو ياكل مال النبى وتلاقية عايز يطلع بسبوبة

مدون بيكتب عن غرامياتة وحبة للشرب واللهو
اعوذ بالله فاسق منحل جاى يفسد اخلاقنا بكلامة الساقط

أصبح الفكر هو التفرغ لنقد الناس وتنصيب انفسنا حكام على الناس
مع ان فى الواقع لو الواحد تفرغ لعيوبة هيلاقها مش بتخلص

ونظرا لإنى لما عملت المدونة دى عملتها لنفسى
يعنى مش فاتحها سبيل
فبحط فيها اللى بحبه فى الوقت اللى احبة
بحب التصوير فتلاقى فيها صور كتير
وبحب الكتابة الساخرة فهتلاقى فيها محاولات للكتابة الساخرة
بحب الشعر والخواطر فهتلاقى محاولات ليا ومختارات لناس بحبهم
بحب المتابعة السياسية فهتلاقى فيها بعض تحليل للاحداث
هتلاقى فيها اجتماعيات وخواطر سياسية ووكلام جد وكلام هبل
وناس كتير والحمد لله تقبّلت الكولكشن ده بكل حب وتقدير

لكن اللى طالع لى فى البخت
ان كل شوية الاقى حد كاتب بوست او باعت لى ايميل او كومنت
بيرمى عليا كلام من اللى ذكرتة فوق
ده بيعمل كذا .. وبيعمل كذا ليه
وليه ما يكتبش كذا أو حتى يكتب كذا

فأحب أقول ان المدونة دى مِلك
مهياش ايجار جديد لمدة سنتين
وانى مش هشوف الناس بتحب ايه واكتبة .. لانها مش جرنان
لكن هكتب اللى يعبر عنى لحظة إمتطاء الكيبورد

والكلام ده مش على لسانى بس .. لأ
على لسان كل اصحابنا اللى دماغهم مليانة

نصيحة أخوية تدوينية
ما تسمحوش لحد يسرق منكم الحرية اللى ادهالكم بلوجر

أحمد الصباغ

لقطات من إفطار المدونين

October 2, 2008
يوم 26 سبتمبر/رمضان كان موعدنا مع إفطار المدونين بساقية الصاوى
اللى كان مفترض يحضرة الفنان خالد الصاوى لكنه اعتذر قبلها بإيام قليلة
الدعوة كانت من المدونة عاليا حليم صاحبة العندليبيات
واليوم كان جميل جدا خصوصا انه اعقب الافطار دردشة جماعية
ووصلات فنية غنائية لـ وينكى وأحمد بكر
ثم زيارة سريعة لمعرض أصالة لرعاية الفنون التراثية والمعاصرة
المقام فى ساقية الصاوى
ثم جلسة فى احد الكافيهات المجاورة
ونظرا لظروف العيد _ كل سنة إنتم طيبين
من الاصدقاء اللى حضروا احمد سوو وداليا قوس قزح ودينا وساجى وبابا ابو خالد واحمد سكر وخالد همس الاحباب وانجى البوهى وباباها الاستاذ محمد وفيق البوهى وعبير مدحت وعلا مدحت ومروة مفروسة الاستاذ احمد عبد المنعم مدونة التعليم ومندهش ونيرمين كلاكيت والعسوولة لينا واريج السمر محمد الجوهرى بوليتيكيا والدكتور احمد ثروت القاضى وزوجتة والكثير من الاصدقاء
هكتفى بالِإشارة لألبومات صور اللقاء على الفيس بوك

لقطات من اللقاء

لقطات من معرض الفنون التراثية والمعاصرة

عيد سعيد عليكم

زرنا مستشفى الأطفال وفطرنا مع بعض .. التغطية

September 14, 2008
تحديث : شيماء زاهر .. كتبت عن اليوم بإسلوبها الادبى الرائع .. وإيناس نهر الحب كتبت حزب بلا مقر

الحمد لله قمنا بزيارة مستشفى أطفال أبو الريش ..وكان يوم فى رأيى موفق بحمد لله وإستطعنا إننا نؤدى جزء صغير من دورنا تجاه أطفال أبرياء مرضى .. وبقول جزء صغير لإننا لسه قدامنا مشوار طويل

وحسيت بفخر شديد وانا فى وسط المجموعة الرائعة اللى جم فى عز الصيام والحر من كل فج عميق
من القاهرة وبورسعيد والمنوفية وطنطا وكل حتة ف مصر

الاتنين أصحاب الدعوة تعبوا أوى فى تنظيم اليوم
داليا .. قوس قزح و رحاب ..كوكب أبى
و
أحمد سوو .. تعب فى تنظيم وحجز الافطار الجماعى بعد الزيارة

اليوم بدأ فى الثالثة عصرا إتجمعنا قدام المستشفى وبعدين دخلنا
ودخلت مجموعة جهزت شنط الهدايا والملابس والتبرعات المادية الاخرى
وتم عمل مجموعات .. كل مجموعة لزيارة قسم معين حسب الفئة العمرية والحالة
المستشفى فيها اطفال من اول مخاليل عساسيل رضع لغاية حوالى عشر سنين دول اللى شوفتهم
المحزن ان المستشفى دى بتضم أطفال مرضى القلب والفشل الكلوى والسرطان والعلاج فيها مجانا لكن أعتقد حجم المساعدات اللى بيتقدم لها قليل لذلك مش عايزين نوقف المساعدات للمستشفى حتى لو تتم بصورة فردية خلال الفترة الجاية
واللى عايز يروح لوحدة ده موقع المستشفى على جوجل إيرث

اليوم فى تقديرى كان يوم جميل جدا والعدد اثناء زيارة المستشفى كان اكتر من سبعين من المدونين وغير المدونين
وانا كنت سعيد اوى وقابلنا مجموعة جديدة من المدونين أول مرة ألتقى بهم
على سبيل المثال كيكى عووووووووو .. انا خلاص سميتها كدة
وهى شخصية لذيذة جدا جدا ودمها خفيف وتحس انك تعرفها من زمااان
و
عبد الرحمن .. مواطن صيدلى مطحون وجودة كان مفاجأة ليا واحنا كانت بيننا صداقة كبيرة لكن ده أول لقاء
وهمس .. مصرية لكن متغاظة آند مفروسة .. والحقيقة قمت معاها بواجب غيظ تمام ههههه
و
مدام إيناس وابنهم عمرة 12 سنة
و ساجى كانت مانعانا من التصوير داخل المستشفى وكنا فاكرينها مسئولة من المستشفى
ولما عرفت انها معانا كنت ناوى اسرق منها الفطار بتاعها بس قولت الطيب احسن ههههههه
بجد شخصيتين من أجمل الشخصيات
و نونا .. صاحبة مدونة المهاجر نموذج لإنسانة متدينة ومنقبة ومتفتحة والكل كان فرحان بيها جدا
الكاتبة والمدونة
شيماء زاهر .. اللى كانت حريصة على متابعة الاخبار معايا قبل الزيارة بتلات ايام وكانت ملهوفة اوى انها تشوف الاطفال وتلعب معاهم
محمد الغزالى .. طبعا مش أول لقاء لكن كان حضورة مفاجأة سعيدة جدا ليا .. لانى عارف مشغولياتة

وغيرهم كتير .. كل الناس اللى كانوا موجودين فى منتهى الجمال
( فى قائمة ببعض أسماء الحاضرين فى أخر التدوينة )

من الحاجات اللى ضايقتنى إن فى ناس جت وكانت واخدة جنب خالص .. لدرجة اننا عرفنا فى اخر اليوم ان فى ناس جت واحنا ما نعرفش .. والمتوقع فى اللقاءات دى انها بتبقى فرصة جميلة للتعارف فمش عارف ليه هما كانوا واخدين جنب كدة

بعد إنتهاء زيارتنا لمستشفى اطفال أبو الريش اليابانى كانت الساعة حوالى خمسة وكانت الناس فيصت من الجوع والعطش والتعب .. ( بضحك عليكم انا بس اللى كنت فيصت من الاثار الجانبية للأكل اللى بعملة ) ههههه
إتوجهنا كلنا لشارع شامبليون ..
مطعم أبو خالد .. وكان سوو حاجز لنا 30 مكان
وطبعا عددنا كان اكتر من كدة .. وكنا قربنا ناكل فى بعض هههه بس الحمد لله المكان كان يساعى من الحبايب ألف
وكان هيحصل اكتر من حادث دلق شوربة على نافوخى لكن ربنا كان بيستر

بعد الفطار .. فى ناس مشيت وناس جت معانا لوسط البلد فى جو رمضانى جميل
ودى لقطات من اليوم الجميل ده


مجموعة من الصور الجماعية قدام المستشفى









الاستاذ الغالى أحمد كمال .. وحبيب قلبى يوسف

أنا .. وميرا

أحمد كمال .. محمد يوسف .. بابا أبو خالد .. أنا .. أحمد سكر

فى أروقة المستشفى



خالد همس الاحباب .. وأحمد شاهين

محمد قلب مصرى .. وخالد

أنا وقلب مصرى وخالد واحمد سكر


ضياء باشا

ودى لقطات للأطباق بعد هجوم الافطار المريع




ألبوم الصور كامل على الفيس بوك
إضغط هنا

ودى بعض أسماء الحاضرين مع الاعتذار عن السهو الخطأ
وأى خطا فى اللينكات او سهو يريت يتم الاشارة له فى التعليقات وانا هعدلة


قائمة ببعض الحاضرين


رحاب – كوكب أبى

داليا قوس قزح

أحمد سوو

أحمد سكر

ميرا – إمراءة بعقل رجل

إيناس نهر الحب

نسمة هانم أخت إيناس

رودى بنوتة مصرية

عبد الرحمن فارس

محمد عطية الشاعر

خالد همس الأحباب

محمد قلب مصرى

بابا أبو خالد

أحمد كمال

محمد محمود يوسف

طارق كوارث

ابن حجر العسقلانى

دعاء مواجهات

همس مفروسة اند متغاطة

كيكى

مهندس محمد .. وايت هارت

دكتورة جنة

محمد الغزالى

محمد حسام

محمد مدحت

سها

سحر غريب وأخواتها الثلاثة

سلوى و سالى و سماح

إيناس وإبنها
some one in life

ساجى

وزة

الاستاذ شريف

عبد الرحمن- مواطن صيدلى مطحون

سوما

شيماء زاهر

الباحث عن الحقيقة

أحمد شاهين – غنوة وحدوتة

صباح الصباح

ضياء

سارة سورسارة

نونا – المهاجر

رحاب – بنات صاحبة الجلالة

يوميات واحدة مفروسة جدا

رشا ونيرمين

مدونون أخرون كتبوا عن اليوم


أحمد سكر
كوكب آبى
كيكى عوووووووووو

طبعا مش هشكركم لأن ربنا يجازيكم خير جزاء ان شاء الله
لكن هقول إن اللى بيعملوه المدونين دلوقت مثال حقيقى على مشاركة الشباب فى خدمة المجتمع .. ومش بس بالكلام
وإن لسه فى بارقة أمل فى شباب لما بيقدر يعمل حاجة بيعملها
وطالما لسه فى شباب من النوع ده .. يبقى مصر مش هتموت

انتظروا التحديث لاحقا

أحمد الصباغ


افطار جماعى للمدونين .. وزيارة مستشفى الاطفال

September 11, 2008
يوم السبت الجاى اللى هو 13/9/2008 ان شاء الله فى زيارة لمستشفى الاطفال اليابانى بأبو الريش
هنتجمع قدام المستشفى الساعة 3م
بدعـــوة من الصديقة المدونة .. داليا قوس قزح
واليوم هينقسم إلى جزئين
الجزء الأول
زيارة لمستشفى أطفال أبو الريش
تقديم هدايا او حلويات أو لبس العيد او اى حاجة تقدر تقدمها عينية او مادية

الجزء التانى
إفطار جماعى فى محل فى وسط البلد اسمه ابو خالد فى شارع شامبليون
و هو بيقدم كباب و كفتة و فراخ مشوية و حمام ده غير الشوربات و الرز و السلطات و الطواجن يعنى الاكل هيناسب كل الاذواق ان شاء الله و الاسعار ممكن تكون فى المتوسط 50 جنيه للفرد كل واحد حسب اللى هيطلبه
واللى اختار وتحرى عن المحل ابن منطقتى اللذيذ سوو وخالد همس الاحباب

وبوست الدعوة على مدونة قوس قزح اهو : خير وفطار
ودى الدعوة على بيكا للبيع : أبو الريش يارب يعيشوا
وده أيفنت الدعوة على الفيس بوك فى صالون المدونين : إفطار جماعى .. وزيارة لمستشفى أبو الريش

نبذة عن المشاركات الاجتماعية السابقة للمدونين

بؤجة الخير

وتضمن زيارة لمصر القديمة متمثلة فى جمعية ومسجد مدينة زهراء مصر القديمة
وجمع البؤج .. ومحاضرة من الدكتورة صبرية عن الحالة فى اسطبل عنتر وعزبة خير الله
كما تضمن مشاهدة للفيلم الوثائقى ..حلم اسطبل عنتر

لمشـــاهدة الفيلم على اليوتــيوب
الجزء الأول
الجزء الثانى



لمشاهدة ألبوم تجمع بؤجة الخير كاملا
إضغط هنا

اليوم الأول للتبرع بالدم بدعوة من نوران الشاملى

وحضرة مجموعة كبيرة من المدونين وقام رئيس مركز الدم بالمصل واللقاح بشرح كيفية التعامل مع الدم والتحاليل التى تجرى عليه بعد جمعة

لمشاهدة ألبوم الصور لهذا اليوم

اليوم الثانى للتبرع بالدم بدعوة من نوران الشاملى
ولقاء المدونين بنادى الزراعيين والاحتفال بيوم ميلاد
سوو ولماضة


لمشاهدة ألبوم الصور لهذا اليوم

بجد أحلى شباب بشوفهم فى مصر
ربنا يحميكم ويكرمكم

مستنينكم يوم السبت
ورمضان كريم .. وكل عـــــام وأنتم بخير

أحمد الصباغ

إحتجازعبد الرحمن فارس فى العريش الان

September 10, 2008
انا ما كنتش متابع أخبار حملة كسر الحصار عن غزة لكن جت لى أنباء عن احتجاز المدون عبد الرحمن فارس صاحب مدونة لسانى هو القلم ومجموعة من شباب 6 ابريل الآن فى شاليه بمدينة العريش شمال سيناء قرب مدينة رفح وهيفضلوا محتجزين لغاية بكرة الصبح والشباب اللى فى اسماعيلية لازال محتجز

إيفنت الحملة على الفيسبوك
يوم العاشر من رمضان يوم الزحف المصرى لكسر الحصار عن غزة

لو جت لى أخبار تانية هقولها واللى عنده حاجة يقولهالنا


Follow

Get every new post delivered to your Inbox.