إمتحان فى الدعارة السياسية

أولاً :
أجب عن جميع الأسئلة الآتيه أو طنش مش هتفرق إنت حيالله حتة مواطن :

“إدّعى كل من رئيس مصر وحاكم قطر وأمير البحرين وعاهل الأردن وملك السعودية وبواب عمارتنا .. أن قرار وقف إطلاق النار كان بفضل مجهوداته العظيمة فى إنهاء مجزرة غزة”
إذكـر أيهـــم أكــثر فـشراً .. مع توضــيح فضــل ودور “أحمد الصباغ” فى قــرار وقف إطـــلاق النار وإنهاء المجــــزرة فوراً

“مصر الشقيقة الكبرى للعرب”
إذكـــر عــدد الأمــراض المصــاب بها قائل هذة العــبارة مع تقبيل يده والدعاء له بالصحة وطــولة العمر

“كتبَ حوالى تمانين مليون مصرى مقالات تشجب وتندد المجزرة الاسرائيلية فى غزة”
إذكر دور وزارة البيئة فى التخلص من أوراق المقالات

“إدعى حاكم عربى بإن الدم العربى ليس رخيصاً أو مهدراً وإنه لن يسمح بالمساس بالمدنيين الفلسطينيين”
إكتب مقالاً من ورقتين عن عاقبة الكذب فى الدنيا والآخرة

“السياسة أدب مش هز كتاف”
إشرح حيثيات هذة العبارة من منظور وسخ ، مع ذكر مائة وخمسين من أوجه الشبه بين السياسة والنصب فى بلادنا العربية

“… وهكذا تحققت الوحدة العربية وصارت دولة الإتحاد العربى من أكبر الدول التى تحكم وتؤثر فى العالم”
أكتب عن تجربة كاتب هذة القصة من بداية دخولة المعتقل وحتى نهايته فى عنبر الخطرين بمستشفى العباسية

“لا مساس بمحدودى الدخل”
من خلال دراستك لعلوم البلاغة إشرح التوريه فى هذة العبارة .. مع ذكر عدد من الوزراء محدودى الدخل

” وإستطاع بفضل صبره وتحملّة وعدم يأسة وعزيمته الفولاذية وخبرتة العاتية فى القتال أن يحصل على رغيف عيش من الفرن”
إشرح دور الصبر فى تحقيق تقدم الأمم ونول المراد من خلال المقولة لا ضاع حق ورائة مطالب

ثانياً :
ضع علامة صح أو علامة خطأ (مش هتفرق ).. فإن رأيك لن يحيى 1500 من شهداء مجزرة غزة

1- الأطفال الفلسطينيين الذين قتلوا فى المجزرة هم إرهابيين ويستحقون القتل ويمتلكون أسئلة دمار شامل (   )

2- المقاومة الفلسطينية وحماس ممولة من إيران وعملاء وخونة ويستاهلوا ضرب الجزمة أما فتح والسلطة الفلسطينية والحاج أبو مازن فيا عينى على جمالهم قمامير خالص (   )

3- إسرائيل خافت من خطاب الريس بتاعنا ووقفّت إطلاق النار فوراً وهى ركبها بتخبط على الجيران (   )

4- تصدير الغاز المصرى لإسرائيل يتم بإتفاقية ولا يجوز نقض إتفاقية مع جارة زى العسل وصديقة حميمة ومزة زى إسرائيل وإلا نبقى دولة إسفوخس (   )

ثالثا :
بماذا تفسر
جندى إسرائيلى طولة 2 متر يحمل رشاشاً آلي ومدفعاً عيار 42 بوصة يجرى أمام طفل فلسطينى طولة 60 سم وعمره 7 سنوات ويمسك فى إيدة حجر

رابعاً :
إذكر المسمى العلمى للعبارات الآتية :

حكام عرب رأوا الأطفال والنساء تقتل فى غزة فتنافسوا فى “الزعيق” لإسرائيل وإستدعوا السفير الإسرائيلى وشخطوا فيه

حاكم غير عربى وغير مسلم وغير إفريقى وغير أسيوى ويبعد عن فلسطين بديشيليون كيلو متر و لم يزور فلسطين بتاتاً وقام بطرد السفير الإسرائيلى من بلادة تأثراً بالمجزرة فى غزة

دولة عربية بها سفارة لإسرائيل خمس أوض وصالة تطل على النيل مباشرة (عند نهاية خريطة من النيل للفرات)  وفى ميدان نهضة مصر (إسم النبى حارسها) وأمام الجامعة مباشرة (بالعند فى الطلاب)

إبن حاكم عربى كنا نراه فى اليوم خمس مرات قبل وبعد الأكل وتراه فى التليفزيون والجرنان والمؤتمرات والزيارات الرسمية لدرجة انك ممكن تشوفة بعينك طالع فى الراديو .. وعندما بدأت مجزرة غزة لم نراه إلا نادراً

كائن ضخم بشع له خمسة أقدام وحراشيف خضراء وسبعة عيون ضخمة  وزعانف سوداء ولا ينام مطلقاً ويأكل ويشرب الدماء والجثث والمدن والبلاد

خامساً :
إمسح ما تحتة خط بمنديل

1- ثم سالت دموع رئيس الوزراء الاسرائيلى حزناً على الضحايا

2- لن ينسى حكام العرب دماء الشهداء الأطفال والنساء فى غزة

3- تخطط إسرائيل لحرب مياه مستقبلية فى الشرق الأوسط

4- وبعد أن تبول المقاتل على التصريحات العربية إستكمل مسيرته فى المقاومة

5- المنطقة معرضة للجفاف بسبب الإسراف فى إستخدام المياه فى إطفاء الحرائق فى مصر

سادساً :
وضح الخيال فى العبارات الآتيه

1- كنت عندما أذهب للنوم فى المساء تهاجمنى تصريحات الحكومة فلا أستطيع النوم

2- غضب الرجل غضبة شديدة فقذفه برغيف عيش مدعم فشج رأسة

3- وكانت نهايته سوداء بالموت حرقاً فقد كان يكذب ويسرق وينهب ويدلى بتصريحات حكومية

أحمد الصباغ

25 Responses to “إمتحان فى الدعارة السياسية”

  1. Somaia Says:

    الأسئلة ديه صعبة أوي
    أنا هذاكر ايه ولا ايه
    وبعدين الناس اللي بتقرا الكلام ده .. كلهم عارفين الإجابات
    اللي محتاج تتبعتله الأسئلة ديه ناس تانيين .. يمكن لمما يفكروا في إجابة الأسئلة .. يفهموا
    ***
    بوست جامد يا أحمد

  2. مهندس مصري Says:

    ياه
    دا انت مبقوق يا بني
    و معاك حق

    اما نشوف بعد المصالحة العربية حيعملوا ايه ؟
    و لو إني متأكد إن تمخض الجبل حيولد فأر ينضم للفئران الكثيرة بتاعة التمخضات السابقة

  3. صيدلانيه طالعه نازله Says:

    حرام عليك الامتحان تعجيزى و مش فى مستوى الطالب محدود الدخل و لا حتى معدوم الدخل طب ممكن نفتح بطاقه التموين قبل ماتتلغى و نغش منها
    لو سمحت اعمل امتحان تانى فى مستوى الحكام متوسطى التفكير و الداعرين محدودى الفكر
    و فتك بعافيه

  4. Bella Says:

    الاسئلة خارج المقرر

    ممكن اخد درس خصوصي

    كده مش ح اجيب مجموع يوديني اي حتة

    ماقولتليش صحيح

    عايز الحلاوة ماركتها ايه؟؟

    ههههههههههه

    رغم ان ماليش نفس اضحك ولا اكتب اصلا لكن صراحة موضوعك خرجني من حالة الصمت المذهول اللى كنت فيها

    بوست ممتاز صراحة

    تحياتي

  5. إيناس حليم Says:

    “كتبَ حوالى تمانين مليون مصرى مقالات تشجب وتندد المجزرة الاسرائيلية فى غزة”
    إذكر دور وزارة البيئة فى التخلص من أوراق المقالات

    جامد أوي السؤال ده
    بس ايه الامتحان اللي يوجع القلب ده
    أتمنى أسقط و معرفش أجاوب على ولا سؤال

    دايما كلامك جامد و مباشر و في الصميم
    ربنا يوفقك

  6. Soul.o0o.Whisper Says:

    مش قادرة اقول غير

    لا تعليق

  7. ~*§¦§ Appy §¦§*~ Says:

    جون يا صباغ بقالك فتره مبتجبش اجوان كده ده جون بجد اسئله حلوة ومنظمه وليها هدف بجد فكرنى اجيب لك سم فيران ونخلص

  8. Anonymous Says:

    الإمتحان صعب أوي يا دكتور وخارج المقرر…ده أصعب من إمتحان الخر سانه في بكالوريوس عين شمس التتخصصي

  9. Anonymous Says:

    الاسئة يا احمد نووية حرقت قلوبنا بدل المرة مية بس ياترى اوباما جاى ومخفى ايه فى شنطته!!! يارب خير \\بسمة مسلم

  10. وومن Says:

    ايه ده بقي امتحان ولا تقليب مواجع

    هم يبكي وهم يضحك بس اللي بيبكي اكتر

    ارفض هذا الإمتحان وافضل السقوك مرات ومرات ومرات

  11. زهرة الجنة Says:

    انت فعلا دكتور
    بس للأسف يطلعوا اسألتك من خارج المقرر
    فليس لها اي أجابة

  12. mostafa rayan Says:

    احمد
    هذاامتحان طويل
    وصعب جدا ولن تجد اي احد لديه القدرة على الرد
    ربنا ينصرنا ويعزنا

    _______________

    في اطار تغيطتك لوقائع معرض الكتاب
    انت مدعو للحدث الادبي الاهم هذاالعام
    وهو صدور المجموعةالقصصية
    ( اعترافات رئيس سابق ) تاليف اخوك كاتب هذه السطور
    مستنيك في حفلة التوقيع وان شاء الله هقولك على معادها قريب
    لك كل التحية والتقدير يا اخي العزيز

  13. زهرة الجنة Says:

    فعلا دكتور
    بس للأسف هيطلعوا كل أسألتك من خارج المقرر لان ملهاش اي اجابة

  14. A.SAMIR Says:

    ينفع كدة يعني؟
    يعني لازم السخرية المريرة اللي زي البكاء دي؟
    ربنا يسامحك يا احمد يا صباغ
    تحياتي

  15. hager za3bal Says:

    ههههههههههههه
    والله هم يبكي وهم يضحك..

    مش بقولك انت زي العسل😀😀

    بس بجد بوست هااااااااايل يا احمد
    تحفه بجد
    عايزه اقولك اني كنت بقرا الكلام وعماله اضحك

    عجبني اوي السؤال دا:

    “السياسة أدب مش هز كتاف”
    إشرح حيثيات هذة العبارة من منظور وسخ ، مع ذكر مائة وخمسين من أوجه الشبه بين السياسة والنصب فى بلادنا العربية

    بس مش محضره الاجابه دلوقتي عشان مش مذاكره كويس
    ههههههه

    بس انا خايفه عليك والله
    احم احم
    في جواسيس هنا؟؟

  16. tarek momen Says:

    بسم الله الرحمن الرحيم
    السؤال الأول ـ ولا واحد من الذكورين
    وقف اطلاق النار كان بفضلي انا
    السؤال التاني ـ ده كان زمان مصر تعيش انت و حاليا امارة هلهليستان العربية هي الشقيقة الكبري
    السؤال التالت ـ وزارة البيئة دي بيئة ومانحبش نتعامل معاها
    السؤال الرابع ـ مين قال انه بيكدب فعلا لن يسمح بالمساس لكن يسمح بالقتل للمدنيين
    السؤال الخامس ـ يكفي ان تنظر للسيد وزير خارجية مصر لتفهم مدلول العبارة و اترك لك حرية الأختيار ان تنظر من الأمام او الخلف مش هاتفرق
    اكتفي بهذا القدر مكن الأجابات
    اسم الممتحن
    رئيس امارة جمهورية هلهليستان العربية

  17. البت المشمشية حلوة بس شقية Says:

    النتيجة
    لم ينجح احد

  18. ادم المصرى Says:

    خارج عن القانون

    ايه يبنى الى انتا فيه ده دا انتا ادولك فرصه هتولع فيهم طبعا هههههههههه

    بس معاك حق بس عشان اجاوب على اسئلتك دى لذم اجى على كل الناس ومش هرحم بجد مش هرحم

    ههههههههههههه

    كان الله فى عونك وهون على نفسك شويه يا عم

    يا استاذ احمد خليها على الله وتعالى زورنى بقه متبقاش بخيل

  19. fahd Says:

    ايه اسئلة الدمار الشامل دي

    وايه يا عم الزخم ده

    ربنا يبارك لك

    علي العموم انا عجبني مصطلح الشقيقة الكبري للعرب

    فاما انها الشقيقة العانس

    او اصبحت مرات ابوهم

  20. micheal Says:

    برافو يا صباغ بجد امتحان هايل وفي مستوي الطالب المتوسط ومن صميم المقرر مش محتاج للخط الساخن بتاع الجمهورية
    تحياتي يا صبوغ

  21. عاشــــــ النقاب ـقــــة"نونو" Says:

    مش لازم بقى ما انا حتة مواطن
    حسبي الله ونعم الوكيل في الظلمة
    موضوع ساخر فاضح
    احييك على طريقة عرضه
    تحياتي

  22. أحمد صلاح البدري Says:

    بجد اسئلة جامده جدا… انا أول مرة ازور المدونه بتاعتك . و كمان ده اول مقال اقراه في المدونة… بس كونت عندي انطباع جميل عنك في موضوعيتك و قدرتك على السخرية
    أحمد

  23. tito_steelheart Says:

    well….all i can say is that….u can really write, ever considered to be a comedian actor?? u can really pull this thing off….good job, keep on it….

  24. أبو أسامة Says:

    ضع علامة صح أو علامة خطأ (مش هتفرق ).. فإن رأيك لن يحيى 1500 من شهداء مجزرة غزة

    استوقفتني هذه الكلمات لأدرك حالة (الحقارة ) التي نعانيها بالفعل حين نصر على أن ننظر للأحداث بتلك الرؤية السطحية التي تعتبر المجاهدين عملاء والحربعلى غزة دفاعا عن النفس … إلخ .

    جزاكم الله خيرا
    والسلام عليكم ورحمة الله وبركاته

  25. مدونة غزة عربية Says:

    مدونة غزة عربية تساعدك لفعل شىء لغزة أولا كيفية التبرع بالمال و أماكن التبرع بها و كيفية التبرع بالدم وأماكنها أيضا, ثانيا مقاطعة المنتجات الامريكية والاسرائيلية , ثالثا الدعاء لهم بأن يثبتهم , رابعا توجد أرقام تليفونات للاتصال بأهل غزة, خامسا بعض الفديوهات و الاناشيد و المقالات المؤثرة , سادسا تعريف الفوسفور الابيض وآثاره الصحية,سابعا ذنوبنا سبب تعاستهم.
    Gazaarab.blogspot.com

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s


%d bloggers like this: